Laura Tuero recuerda qu’Adrián Barbón anunció esta selmana qu’en seronda va ponese en marcha el procesu d’oficialidá del asturianu y l’Ayuntamientu “habría de dar yá pasos significativos hacia esi escenariu”
El grupu municipal de Podemos-Equo Xixón pide que s’empiece a aplicar nel Teatru Jovellanos el Plan de Normalización Llingüística 2020-2023, aprobáu va un añu, nel plenu del 3 d’agostu de 2020. La portavoz, Laura Tuero, llevó ayeri a la Comisión de Servicios y Derechos Sociales el pidimientu de que dende’l tercer trimestre d’esti añu “l’asturianu tenga una presencia curiosa na programación trimestral del Teatru Jovellanos, qu’habría de ser billingüe, asina como na publicidá, información y publicaciones de los actos programaos nesi espaciu”.
Na rempuesta dada ayeri na comisión, l’equipu de gobiernu “nun asumió nengún compromisu nesti sen. Informónos simplemente de que l’asturianu ta usándose al comienzu de los espectáculos programaos nel Jovellanos pa pidir al públicu asistente que silencie los teléfonos móviles”, señala la portavoz de Podemos-Equo Xixón, que considera “insatisfactoriu y escasu’l compromisu del gobiernu local cola normalización social del asturianu”.
Laura Tuero recuerda al equipu de gobiernu que’l presidente del Principáu, Adrián Barbón, anunció esta selmana qu’en seronda va comenzar nel Parlamentu asturianu’l procesu llexislativu qu’ha de culminar cola oficialidá del asturianu. L’Ayuntamientu, diz la portavoz, “habría de dar yá pasos significativos hacia esi escenariu”. Llamenta que “non solo nun se tán dando avances na normalización del asturianu sinon que, nel casu concretu del Teatru Jovellanos, paez que se tán dando pasos atrás”. Pon como exemplu qu’enantes la programación trimestral del teatru publicábase “polo menos colos meses n’asturianu y agora yá nin siquiera eso”.
Laura Tuero cita’l puntu 18 del Plan de Normalización Llingüística, qu’establez que se ha de “procurar l’usu del asturianu na marca publicitaria de la ciudá, na publicidá, información y publicaciones d’eventos relevantes de Xixón que tengan que ver cola proyeición esterior del Conceyu p’asina fomentar la imaxe cultural del Conceyu y venceyala col asturianu; ya seyan los entamaos pol Conceyu de Xixón o nos qu’ésti participe de manera preminente”.
