Podemos-Equo Xixón pide convocar al Conseyu Asesor de la Llingua pa revisar la execución del Plan de Normalización

Laura Tuero: “El Conseyu, que tien que reunise a lo más cada trés meses, nun se convocó dende agostu”

Podemos-Equo Xixón va pidir esti vienres na comisión de Derechos Sociales que se convoque al Conseyu Asesor de la Llingua, que se reunió por última vegada’l 17 d’agostu de 2020, pa realizar un seguimientu del Plan de Normalización Llingüistica dempués de que’l Conceyu firmara un conveniu de collaboración cola Academia de la Llingua pa lo que paez que ye la puesta en marcha de delles midíes del Plan.

“El Conseyu Asesor de la Llingua nun tuvo más información dende esa xunta, que se celebró n’aprobándose’l Plan nel plenu del 3 d’agostu. Y eso que los sos estatutos determinen que tien de reunise  con una periodicidá máxima de tres meses y que’l mesmu Plan recueye que la Oficina de Normalización Llingüística va ser la encargada de facer el siguimientu añal del Plan de Normalización  y d’informar d’ello al Conseyu Asesor de la Llingua”, esplica Laura Tuero, vocera del grupu municipal. 

Adaptar el plan

Esti seguimientu tien por oxetivu llevar alantre un análisis y una reflexón en comuña de los resultaos pa dir faciendo adaptaciones y axustes si se diere’l casu. Por eso, Podemos-Equo Xixón pide que nesta reunión s’informe al Conseyu Asesor de la Llingua del estáu d’execución de les midíes previstes nel Plan, dalgunes d’elles habíen de llevase a cau yá en 2020, con especial atención a l’aplicación de la ordenanza municipal d’usu del asturianu na Alministración.

“Tenemos que dar pasos decidíos pa protexer la nuesa llingua y non quedanos nel papel. Queremos ver que l’equipu de gobiernu tien voluntá d’ello”, añade Laura Tuero.