Podemos-Equo Xixón va pidir esplicaciones pola ausencia del topónimu Xixón nel Open ATP 250 y pola falta de conteníos n’asturianu na web del Ayuntamientu
“Nun tamos viendo avances significativos en materia llingüística nel ámbitu municipal esti mandatu”, llamenta Laura Tuero, que rexistró un garrapiellu de preguntes sobre l’usu del asturianu pa la Comisión de Servicios y Derechos Sociales d’esti xueves. La vocera de Podemos-Equo Xixón quier que l’equipu de gobiernu xixonés dea esplicaciones, ente otres coses, sobre l’ausencia del topónimu Xixón nel tornéu de tenis Gijón Open ATP 250 y sobre la falta de conteníos n’asturianu na páxina web del Ayuntamientu.
La conceyala quier saber tamién si toles ordenances y reglamentos aprobaos esti mandatu tán tornaos al asturianu, “que ye lo qu’establez la Ordenanza Municipal del Usu de la Llingua Asturiana”. Concreta que, “polo que nos consta, son ocho les normes aprobaes esti mandatu y que, según el III Plan de Normalización, habríen de tar tamién disponibles n’asturianu: Ordenanza de Movilidá Sostenible, Reglamentu del Conseyu de Salú Animal, Reglamentu del Conseyu de Cultura, Reglamentu Orgánicu de Plenu, Reglamentu de l’Asesoría Xurídica, Reglamentu del Conseyu de Movilidá Sostenible, Reglamentu Orgánicu d’Organización, Funcionamientu y Réxime Xurídicu, y Réxime de Fiscalización y Intervención Llendada Previa nel Ayuntamientu de Xixón y los sos organismos autónomos en materia de contratación y subvenciones”.
Asinamesmo, Laura Tuero entruga cuándo se va convocar la Comisión de Siguimientu del Plan de Normalización Llingüística, porque “se dixo que la Comisión diba xuntase en setiembre y yá ta acabando’l mes d’ochobre”. Amás, recuerda que’l Plan de Normalización recueye la midida de «usar topónimos oficiales nes señales urbanes, nos mapes y nos documentos oficiales y d’usu na Alministración», pero “vemos casos como’l de marques viales nel pavimentu destinaes a acutar sitios pa vehículos llétricos onde s’emplega namás el topónimu castellanu”.
Tres l’aprobación del III Plan de Normalización Llingüística (2020-2023) nel Plenu d’agostu de 2020 había que crear una Comisión de Siguimientu, nel senu del Conseyu Asesor de la Llingua, pa velar pol cumplimientu de les midíes previstes nel Plan de Normalización Llingüística y na Ordenanza Municipal del Usu de la Llingua Asturiana nel Conceyu de Xixón. La Comisión “creóse en xunu de 2021; ye dicir, tardóse cuasi un añu”, señala Laura Tuero.
No que se refier al Conseyu Asesor de la Llingua, según los sos estatutos tien que xuntase cada tres meses. En 2021 aconceyó cuatro vegaes, “pero tamos diendo a peor, porque en 2022 fízolo solo una, y amás foi en plenu branu, el 18 de xunetu, cuando suel haber xente de vacaciones”, comenta la vocera de la coalición morada y verde. Nesi últimu conceyu del Conseyu “falóse, de nueves, de la torna de los conteníos de la páxina web municipal, dalgo que yá reclamara Iniciativa pol Asturianu en mayu de 2021. Dende Podemos-Equo Xixón tuvimos que pidir esplicaciones a lo llargo d’esti mandatu pola desapaición del asturianu nel programa d’actividaes del Teatru Jovellanos o pola ruina presencia de la llingua nes actividaes del Xardín Botánicu, por poner dos exemplos”. Per otru llau, añade, “desconocemos si, como establez la Ordenanza Municipal del Usu de la Llingua Asturiana, toles nueves ordenances, reglamentos y bandos tán redactaos en forma billingüe pa que la ciudadanía tenga la posibilidá de consultalos en castellanu o n’asturianu”.
Laura Tuero diz que “tampoco vemos avances significativos na toponimia. Hai espacios del ámbitu municipal onde sigue ausente y otros onde s’incorporó. Esti añu per vez primera’l cartelu oficial de la Selmana Negra recoyó’l doble topónimu anque eso ye dalgo qu’establez el Plan de Normalización. Y La FeLiX, la Feria del Llibru de Xixón, dende’l so orixe usa esclusivamente’l topónimu asturianu. Sicasí, nes mentaes marques viales pa vehículos llétricos emplégase namás el topónimu castellanu”. Y camienta que “nun ye de recibu que l’Ayuntamientu nun velara pol usu del topónimu asturianu nel tornéu de tenis ATP 250 que se celebró nel Palaciu de Deportes. El Plan de Normalización determina qu’ha d’emplegase en tolos eventos con proyeición esterior, como yera esi casu, onde l’Ayuntamientu amás aportó 1,2 millones d’euros pa la financiación del tornéu”.
