Laura Tuero llamenta que solo se reuniera dos veces a lo llargo del mandatu, “dalgo ablucante teniendo en cuenta que’l Plan propón cuasi un centenar de midíes”
L’equipu de gobiernu comprometióse, nel plenu d’esti miércoles, a convocar nel plazu máximu d’un mes a la Comisión de Siguimientu pa llevar a cau la revisión del III Plan de Normalización Llingüística de Xixón y dar a conocer la evaluación del mesmu enantes de qu’acabe’l mandatu. El PSOE aceptó’l ruegu que presentó nesi sen Laura Tuero, que recordó que la mentada comisión solo se reunió en dos ocasiones a lo llargo del mandatu y l’últimu alcuentru “tuvo una duración de malpenes un cuartu d’hora, dalgo ablucante teniendo en cuenta que’l Plan de Normalización propón cuasi un centenar de midíes”, y tamién señaló que “echamos en falta una presencia tresversal de la llingua na acción de gobiernu municipal”.
El Plan de Normalización Llingüística de Xixón (2020-2023) recueye 93 actuaciones p’avanzar nel usu del asturianu nos ámbitos de l’Alministración local, la enseñanza, la tresmisión familiar y ente la mocedá, el comerciu y hostelería, l’ociu, deporte y actividá cultural, amás de los medios de comunicación y les nueves teunoloxíes. Col oxetivu de supervisar el cumplimientu d’eses midíes creóse a través del Conseyu Asesor de la Llingua, en marzu de 2021, la Comisión de Siguimientu del Plan de Normalización.
Na so intervención, la vocera del grupu moráu y verde dixo que’l III Plan de Normalización Llingüística “ufría una bona oportunidá pa dir abriendo camín, nel ámbitu municipal, al reconocimientu efectivu del asturianu, que ye una ayalga, un tesoru cultural, un heriedu patrimonial de la ciudadanía xixonesa, de la población asturiana y del mundu enteru, porque les llingües, toes y caúna d’elles, son patrimoniu inmaterial de la humanidá”. Sicasí, llamentó que’l mentáu Plan acabara siendo “una oportunidá perdida, una más, pa protexer y da-y puxu, nesti casu nel ámbitu de l’Alministración llocal, a los derechos llingüísticos de les y los xixoneses que sienten l’asturianu como la so llingua propia o como una de les sos llingües propies”.
