Laura Tuero: “Mientres Barbón diz que defende la llingua, el PSOE xixonés nun cumple nin siquiera con dalgo tan cenciello como la toponimia”

La vocera del Grupo Municipal de Podemos-Equo Xixón llamenta qu’en materia llingüística “nun se producieron avances significativos a lo llargo d’esti mandatu” 

El Grupu Municipal de Podemos-Equo Xixón denunció güei’l “pocu apreciu y compromisu” del equipu de gobiernu xixonés cola llingua asturiana, razón pola que “nun se producieron avances significativos a lo llargo d’esti mandatu que yá ta dando les boquiaes”. Laura Tuero dixo  ayeri en rueda de prensa que “mientres el presidente Adrián Barbón diz na Xunta Xeneral que defende la llingua y que llamenta’l despreciu al nuesu patrimoniu cultural por parte de dalgunos, el PSOE xixonés nun cumple nin siquiera con dalgo tan cenciello como respetar la toponimia asturiana nel ámbitu municipal”.

Nesi sen, la conceyala va entrugar nel plenu d’esti miércoles si l’equipu de gobiernu tien previstes midíes “pa que se normalice l’usu del topónimu Xixón en tolos eventos organizaos o financiaos pol Ayuntamientu”. Pon como exemplu llaceriante que nel Gijón Open 250 ATP, celebráu va un mes nel Palaciu de Deportes, el topónimu Xixón nun tuvo nenguna presencia, a pesar de que l’Ayuntamientu financiaba con 1,2 millones d’euros la organización d’esi tornéu de tenis y a pesar de que’l Plan de Normalización Llingüística establez qu’ha d’emplegase l’asturianu «na marca publicitaria de la ciudá, na publicidá, información y publicaciones d’eventos relevantes de Xixón programaos a lo llargo del añu que tengan que ver cola proyección esterior del Ayuntamientu».