Podemos-Equo Xixón va llevar al plenu un ruegu pa que se revise’l plan na Comisión de Siguimientu: “Reunióse solo dos vegaes a lo llargo d’esti mandatu y l’últimu alcuentru tuvo una duración de malpenes un cuartu d’hora”
Podemos-Equo Xixón quier que la Comisión de Siguimientu se reúna pa llevar a cau la revisión del III Plan de Normalización Llingüística de Xixón (2020-2023), col envís de conocer el grau d’execución de caúna de les midíes a traviés d’un informe final que reflexe’l nivel de cumplimientu de los sos oxetivos y dalo a conocer enantes de qu’acabe’l mandatu. La vocera de la coalición, Laura Tuero, va pidir al equipu de gobiernu, a traviés d’un ruegu nel plenu, qu’esta reunión se lleve a cau nel plazu máximu d’un mes. “Tamos na recta final del mandatu. Al equipu de gobiernu nun-y preocupa que’l Plan de Normalización Llingüistica de Xixón tea a puntu d’acabar ensin avances y nun ta previsto que se propongan nueves midíes, tres evaluar el plan vixente, pa fortalecer la presencia y l’usu de la llingua asturiana en Xixón nel plan nuevu y, lo que ye peor, n’Asturies siguimos ensin oficialidá”, sentenció.
El Plan recueye 93 midíes p’avanzar nel usu del asturianu nos ámbitos de l’Alministración local, la enseñanza, la tresmisión familiar y ente la mocedá, el comerciu y hostelería, l’ociu, deporte y actividá cultural, amás de los medios de comunicación y les nueves teunoloxíes. “El Conseyu reunióse solo dos vegaes a lo llargo d’esti mandatu, el 16 de payares de 2021 y el 19 d’avientu de 2022. Esi últimu alcuentru tuvo una duración de malpenes un cuartu d’hora, dalgo ablucante teniendo en cuenta que’l Plan, como queda dicho, propón cuasi un centenar de midíes, de les que 51 yá habríen de tar desarrollaes, según establecía’l propiu Plan en 2020; ye dicir, el 55% d’elles”, esplicó Laura Tuero.
Recuerda que’l documentu tamién recueye que la Comisión de Siguimientu del Plan de Normalización ta “dirixida al siguimientu del cumplimientu de les midíes que se prevén pa l’Alministración local nel Plan de Normalización Llingüística y na ordenanza municipal d’usu del asturianu”. “Difícilmente puede llograse con dos reuniones en tres años”, dexó claro la vocera.
