La inspiración y l’exemplu de Yolanda Huergo

Alcordanza de l’anterior portavoz de Podemos-Equo Xixón, fallecida va un añu

RUBÉN ARDURA

Va unos meses, enrestrando alcordances con una collacia de Yolanda, de pronto paró y dixo: “Ye que vaya semeya que dexó Yolanda”. Dióse cuenta, vamos dándonos cuenta a lo llargo d’esti añu, de la dimensión d’una personina xigante, de cómo de viva tuvo en tolo que tien importancia y en tolo importante, como diz el cantar.

Les más de les veces solemos decatanos depués, cuando les persones falten, ye natural, y la humildá apolmonante de Yolanda nun diba permitir otra cosa, pero lo estraodinario del compromisu que desplegó siempre lo tuvimos delantre. Dende que de moza entamó a militar na defensa de los derechos humanos más básicos, cuando se punxo a trabayar pa qu’Asturies dexe de pasar la vergoña de ver el so idioma morrer, y a partir d’ehí puxar pa qu’una visión asturianista de la política tenga’l so espaciu n’Asturies, siempre tuvo presente una manera d’entender la vida que tiraba d’ella pa facer tolo que pudiera por cambiar les coses. Y ye que, tengo pa min, lo más admirable nun ye tanto les hores echaes nestes causes y valores, sinón la preocupación sincera, la cuota d’infelicidá qu’asumes porque intentes que dalguién en dalgún llau tea meyor. Ser consciente de que’l tuyu ye un granín pequeñu nuna sablera y aún asina facelo, esa ye la diferencia.

Dicía más arriba que’l compromisu de Yolanda yera estraodinariu, pero equivócome, pa min ye estraodinariu porque lu viví en toles sos formes, pero esa manera de ser ye más abundante de lo que queremos ver. Seguro que tolos que tais lleendo esto podéis parar un momentu y pensar en persones comúnmente estraodinaries que tenéis bien cerca. Bien, eses persones son les que non solo tenemos que reconocer, eso nun ye lo más importante; lo que tienen que facer ye inspiranos. Creo qu’esi ye otru de los regalos que nos dexó Yolanda Huergo, ponenos enriba la mesa la inspiración y l’exemplu. El que si ella pudo facer, nosotros tendremos que poder, el dicinos que podemos sumar caún esi granín d’arena hasta facer la sablera onde Yolanda dexó escrito lo que caún necesitamos lleer pa siguir, pa que dempués lo borre la marea y lo vuelva a escribir otra persona.